حضرت عمر رضی اللہ عنہ اور ایک بوڑھی نابینا عورت

مدینہ کی جانب ایک چھوٹا سا گھر تھا جس میں ایک نابینا بوڑھی عورت رہتی تھی، جس کے پاس ایک ڈول، ایک بکری اور کھجور کے پتوں سے بنی چٹای کے سوا دنیا کا کچھ سامان نہیں تھا، حضرت عمر بن خطاب رضی اللہ عنہ ہر شب اس عورت کی خبر گیری کیا کرتے تھے، اس کے لیے پانی کا انتظام کرتے اور اس کی حالت سنوارتے۔

اس بات کو ایک عرصہ بیت گیا۔ ایک دن حضرت عمر بن خطاب رضی اللہ عنہ اسکے گھر تشریف لے گئے تو دیکھا کہ ہر چیز باسلیقہ اور ترتیب کے ساتھ رکھی ہوئی ہے۔ فوراََ سمجھ گئےکہ ضرور ان سے پہلے کوئی شخص آیا ہو گا جس نے سارا کام درست کر دیا، اس کے بعد آپؓ کئ بار آئے اور ہر مرتبہ دیکھتے کوئی شخص ان سے پہلے آ کر گھر کا کام کر جاتا ہے 

اور گھر کی صفائی وغیرہ کر جاتا ہے۔

ایک دن:  حضرت عمر رضی اللہ عنہ یہ معلوم کرنے کے لیے کہ آخر کون ان سے پہلے آکر سارے کام کر جاتا ہے، گھر کے قریب کسی کونے میں چھپ گئے۔ اچانک ایک آدمی کو گھر کے قریب آتے دیکھا، اس نے دروازہ کھٹکھٹایا، پھر اندر چلا گیا، وہ حضرت ابو بکر صدیق رضی اللہ عنہ تھے جو ان دنوں مسلمانوں کے خلیفہ تھے۔ حضرت عمر رضی اللہ عنہ اس پوشیدہ جگہ سے باہر آئے، آپؓ کے لیے حقیقت امر واضح ہو گئی، اپنے آپ سے تعجب کرتے ہوئے کہنے لگے: ابوبکر! خدا کی قسم ! تم ہی ہو سکتے ہو، خدا کی قسم ! تم ہی ہو سکتے ہو۔

حوالہ: حضرت عمر رضی اللہ عنہ کے 100 قصے